حياته
الملك فاروق اتجوز مرتين، المرة الاولانية و هو عندة 18 سنة اتجوز من واحدة من بنات الباشاوات اسمها صافيناز ذوالفقار اللي بعد الجواز بقى اسمها الملكه فريده وجابو تلات بنات: الاميرة فريال،الاميرة فوزية و الاميرة فادية.فاروق كان تحت ضغط كبير لانه ماجابش ولي للعهد و كمان بسبب المشاكل اللي بينه و بين مراته فريدة اضطر يطلقها سنة 1948. الطلاق دا زعل مصريين كتير اللي بيقدسو الحياة الزوجية بشكل عام و خرجت مظاهرات كبيرة بتندد بالطلاق دا.تاني مرة اتجوز فيها الملك فاروق من واحدة من الشعب اسمها ناريمان صادق سنة 1951 وجابو ابن سموه احمد فؤاد التاني اللي بقى ملك مصر بعد كدا لما ابوه اتنازله عن الحكم.فاروق و ناريمان اتطلقو سنة1954 . في واحدة ست ايطالية اسمها إيرما مينوتولو رافقت الملك فاروق في المنفى و بعد ما مات قالت انهم كانو متجوزين بس مافيش دليل يثبت ان فاروق اتجوز لتالت مرة.
فترة الحكم
فاروق الاول هو ابن الملك فؤاد الأول و حفيد محمد على باشا باني و مؤسس مصر الحديثة ، كمل تعليمه في الاكاديمية الملكية العسكرية في انجلترا ومسك الحكم وهو عنده 16 سنة تحت مجلس وصايه ، واول ما اتوج عمل خطاب للشعب في الراديو و دي كانت اول مرة في مصر ان الملك يوجه فيها خطابه للناس بشكل مباشر. سنين حكم الملك فاروق كانت صعبة بسبب الحرب العالمية التانيه و الاحتلال الانجليزي و المخابرات الالمانية و القوى الوطنية المصرية. كل العوامل دى اثرت على اداءه كملك و غيرت مشاعر المصريين ناحيته من حب جارف لاتهام بالعماله و خصوصا بعد خلافه مع حزب الوفد اللي كان حزب الاغلبية في مصر في الوقت ده.
انقلاب الظباط
بدعم من المخابرات الامريكية انقلب مجموعة من الظباط الصغيرين في السن بقيادة جمال عبد الناصر على الملك و لكن الملك ماستعملش معاهم القوه وكان حريص على سلامة وامن مصر وفضل انه يشوف هما عايزين ايه و لما طلبوا انه يتنازل عن الحكم لولى العهد الامير احمد فؤاد وافق و ماطلبش مساعدة القوات البريطانية اللي كانت موجودة في الوقت دا في قناة السويس
و سافر الملك فاروق لايطاليا في 26 يوليو سنة 1952 وفضل بره مصر لحد ما مات سنة 1965 . اعتذر اللوا محمد نجيب عن قلة ذوق جمال سالم و هو بيودع الملك على يخت المحروسة و ضربت المدفعية 21 طلقة تحية للملك اللي فضل انه يتنازل عن الحكم على انه يقاوم و يتسبب في قتل مصريين بسلاح المصريين
التليفزيون
في سنة 2007 عرضت قناة الـ ام بي سى مسلسل اسمه (الملك فاروق) و قام فيه بدور الملك الممثل السوري تيم الحسن و اللي عرض لاول مرة صورة متوازنة للملك بعد سنيين كنيرة من التشويه المتعمد اللي قام بيه التلفزيون و السينيما المصرية لاسباب سياسية (زي مسلسل رد قلبي وفيلم امراة هزت عرش مصر).المسلسل دا حقق نجاح كبير في مصر و براها ورد الاعتبار لفاروق الاول و صور نواحي انسانية في حياته.
النهاية
مات فاروق الاول في إيطاليا في 18 مارس سنة 1965 وبيعتقد ناس كتير انه مات مقتول بالسم على ايد البغدادي بتكليف من جمال عبد الناصر اللي رفض تنفيذ و صيته الوحيدة انه يندفن في مصر. الرئيس السادات سمح بدفن رفاته في مقابر عيلة محمد على في جامع الرفاعى و كمان سمح لابنه الملك احمد فؤاد التاني انه يجيب مراته علشان تولد في مصر.
ليست هناك تعليقات:
إرسال تعليق